بقلم : تامر الجوهري
ابني مش عايز يكتب الواجب
بنقعد بالساعات علشان يخلص
ومش بيخلص كل الواجبات
أخته مش كده
بتيجي من المدرسة بتخلص الواجب بسرعة
وبتخلص واجبات المواد كلها
أنا متوترة وقلقانة
ومش عارفة أعمل ايه
دي مشكلة على لسان معظم الأمهات
بنقابلها كلنا وقت الدراسة
تعالي معايا سطر سطر أفهمك الأسباب ونشوف هنعمل ايه ؟؟
عملوا دراسات علشان يعرفوا الفرق بين الذكور والإناث في التعليم
وجدوا أن :
1 - في سن الخمس سنوات المناطق المتعلقة بالقراءة والكتابة في مخ البنت نمت وتطورت اكتر من الولد.
2 - في سن الخمس سنوات البنت تقدر تتكيف أسرع من الولد في نظام التعليم في القرن ال 21
3 - البنت بتهتم أن مدرستها تكون مبسوطة من أدائها أكتر من الولد معندوش نفس الاهتمام
المعلومات دي لما الأم أو المُدرسة بتعرفها هتعرف انها :
متقارنش بين ابنها وبنتها في مستوى التحصيل لأنهم بالفعل مختلفين
مش مفيد اني ادخل ابني المدرسة من بدري وأن ده أفيدله .. بالعكس
نكمل مع بعض
4 - البنات ممكن تكتب الواجب علشان المُدرسة طلبت منهم انهم يعملوه
الأولاد هيعملوا الواجب فقط لو بيحبوا المادة أو مهمة وممتعة ليهم
لو الواجب بالنسبة له ( رخم وسخيف وممل ) مش هيعملوا
5 - البنات بتعمل الواجبات كلها
الاولاد حتى لو عمل الواجب مش هيعملوا كله
6 - البنات بتهتم بالدرجات وبتحب تجيب الدرجات النهائية
الاولاد مش بتهتم بالدرجات عادي يعني
7- البنات بتهتم برأي المدرسة في الواجب ( معمول كله وصح وشكله حلو )
الاولاد مش بيفرق معاها رأي المدرسة في التفاصيل .. المهم أنه أتعمل
8 - البنات في كل الاعمار مهما عملوا من أنجازات مش بيبقوا حاسين برضا عن انجازاتهم
عكس الولد بيشوف نفسه برنس علشان عمل الواجب اللي عليه حتى لو مش كله
هنا الدراسات بتقولك ايه :
أن ده مش علشان البنات أذكى لكن علشان البنات بتحاااااول أكتر
كده خلصنا الأسباب الخاصة بطبيعة الأولاد
بس مش دي اللي مسببة المشكلة
المشكلة في أن نظام التعليم مش مناسب لطبيعة الأولاد
الأولاد بتهتم بكل ما هو ملموس .. هتهتم بالتجربة .. هتهتم بالحاجة البصرية
هتهتم بالحاجة اللي هتشتغل بيها وتشغل فيها إيديها ومخها 🖐🧠
غير كده بالنسبة لهم ملل 🥴
طيب أنا كأم دلوقتي أعمل إيه 🙆♀️
1 - هعرف طبيعة إبني .. زي ما اتكلمنا فوق ( وطبعا لكل قاعدة شواذ )
2 - هستفيد من معرفتي لأبني أني أخلق حواليه بيئة محفزة للتعليم
( هحفزه أنه يخلص بحاجة بتحفزه أصلاااا )
يعني الحاجة اللي بيهتم بيها وبيحبها أخليها يا محفز قبل الواجب أو بعد الواجب
وبديله الحرية في الأختيار ..
3 – أستفيدي من معرفتك دلوقتي انه بيحب التجارب ولو في حاجة ممكن تجربوها سوا
جربوها سوا هيتبسط جدااااا وعمره ما هينساها وهيبقى وقت الواجب بالنسبة له ممتع ..
4 - أنا كأنثى ينطبق عليا الكلام الكلام اللي على البنت ( زي ما قولنا فوق )..
يعني أنا مش شبه ابني
يعني منتظرش من نفسي الرضا عن مستواه ( فبلاش كل شوية تقوليله وحش )
لانه مهما عمل مش هرضى
5 - أسيب المسئول عن التعليم ( المُدرسة ) هيا اللي تهتم بما يخص المَدرسة .
يعني لو معملش الواجب كله .. سيبي المُدرسة تتصرف معاه
عمل الواجب بخط مش عاجبك متمسحيلوش اللي كتبه
الاااا لو 👇
وافق علشان يكتب أحسن منه .
يعني مثلا : الله ده حلو جدااااا اللي أنت كتبته ده .. خطك حلو أوي شكله منظم وجميل
لو في حاجة مش مظبوطة ممكن أقوله بس دي مش زيهم .. تحب نعدلها ؟؟؟ لو وافق تمام ,, موافقش مش مشكلة
5 – الواجب بتاعه مش بتاعك
فـ الأم اللي بتقول خلصنا الواجب !!
يالا علشان نعمل الواجب !!
أو بالفعل بتعمل الواجب هيا !!
لأأأأ .. ده مش بتاعك
أنتي واجبك أنك توفريلله الوقت والمكان المناسب اللي يقدر ينجز فيها مهامه وواجبه
6 - عرفيه أنك موجودة لو أحتاج مساعدة ..
7 - عرفيه أن لو في حاجة مش فاهمها ممكن يرجع للمدرس بتاعه ويسأله ( حسب سنه )
٨- مش معنى أن الدراسة بدأت يبقى البيت مكهرب
في وقت للعب ووقت للواجب طبيعي
متنسيش أنه طفل وظيفته أصلا اللعب
وأن اللعب ضروري لنموه واكتساب معرفة جديدة
مش هيكتسبها وهو قاعد بيكتب الواجب
كده أنا خلصت ..
عارفة أن التطبيق مش سهل .. كلنا لها
دلوقتي انتي عرفتي وفهمتي
أفضل من أنك تزعقي وتتخانقي
وتعقدي الولاد من المزاكرة وحب التعلم
وترجعي تحسي بالذنب
