وليد محمد
القصة: بتحكي عن يحي صالح الخياط وهو طالب فى كلية هندسة ولكنه شخصيته ضعيفة وبيتم التنمر عليه ومالوش صحاب وبتجمعة علاقة قوية فى والده ولكن بتحصل حاجة شبه فيلم "تراب الماس" بتحصلهم هما الإثنين ودة بيخليه عنده دافع للإنتقام ويصنع الروبوت موسى وييقرر الانتقام... وبنشوف اية اللى هيحصل؟؟
- الفيلم نوعية جديدة على سينما المصرية وهي "سوبر هيرو" ويحط التصنيف معاه خيال علمي وجانب الدراما وجانب المغامرات والأكشن ... هل الفيلم نجح فى دة ؟
- على جانب الدرامي: الفيلم كان جيد جدا وفجأني جدا بمستواه لإن السيناريو كان محكم وممكن أقول إن الفيلم عمل توازن جيد بين الجانب الدرامي وجانب الخيال العلمي.. لأن السيناريو ماشي على شخصية "يحي صالح الخياط" وممكن نعتبرها دراسة شخصية.... وكمان هو ييخوض تحديات وعنده تحولات درامية فى شخصيتة مروروا طبعا بتطورات الروبوت وعمقى الاحداث بيتغير مرة عن مرة كمان قدر يدينا مبررات كافية للتحولات الشخصية ...وكل دة قدر يعكسه "كريم محمود عبد العزيز" بشكل جيد جدا ودة أفضل دور عمله فى مشوراة وفى رأي دة تطور كبير إنه قدر يعمل مشاهد درامية حقيقي كانت مؤثرة
- غير كدة كمان خطوطة الفرعية وعلاقتة مع الشخصيات كانت معمولة كويس سواء مع دكتور الجامعة أو مع صديقته اة مع البنت اللى بيحبها وكل دة كان معمول كويس و بعنايه وليهم تأثير على القصة.
- ف السيناريو على مستوى الشخصيات و البناء الدرامي كان كويس جدا وخد وقتة فى تقديم كل دة من الفيلم.. يعيبة بس إن حسيته مكرر بنفس سيناريو شخصية فيلم الهرم الرابع بنفس خطوطة تقريبا معادا خط الدكتور ويمكن خط صاحبتة رغم إن مكرر بنفس الشخصية ولكن الفرق إن هي بتخش فى الاحداث معانا وبتساعد بطلنا
- على جانب الخيال العلمي: ف الفيلم قدر يقدملنا سقف اعلى شوية من ناحية السوبر هيرو...وكمان كان عنده مراحل مناسبة لتقديم وصنع شخصية الروبوت فيما عدا مرحلة واحدة تم اختصارها فى أغنية ل نسمة محجوب اللى بالمناسبة أغنية حلوة جدا... هي مواصفات الروبوت وعمل له اختبارات عشان نعرف قدراتة ولكن السيناريو أغفل الجانب دة تماما والمفروض كان ياخد وقت أكبر من كدة وديه تعتبر فجوة لأن كمان هو مابرزش نقط القوة أو الضعف إلا لما دخلنا على مغامرات.. ف الجانب دة كان محتاج اهتمام كبير
- إما على الجانب الاكشن و المغامرات: ف الفيلم كان يتراوح بين ممتاز وجيد جدا... وخصوصا إن الفيلم فيه أفكار أول مرة تتنفذ والمؤثرات البصرية فيها كانت رائعة وكانت مليانة تحديات و صعوبات وكانت فيها اثارة وتنفيذها كانت حلوة جدا... يمكن بس يعيبه إن بعض حركات الروبوت مكانتش أفضل حاجة ومحتاجين نشتغل على الجانب دة شوية... واللى ساعد فى دة موسيقي التصويرية ل خالد الكمار اللى كانت متوظفة حلو فى الاحداث كالعادة
- على مستوى الأداء التمثيلي اتكلمت عن كريم محمود عبد العزيز.... شخصية أياد نصار كان مقدم أداء ممتاز وعجبني إن إحنا طرحنا خلفيات لشخصيتة ولكن كنت أفضل آكتر لو كنت أشوف معظم الحكاوي على لسان الشخصيات فى شكل فلاش باك وكانت هتفرق فى تفاصيل الفيلم... أسماء أبو اليزيد كانت جيدة جدا وكانت دمها خفيف... طبعا ظهر كتير من ضيوف الشرف وكلهم كانو كويسين و موفقين وعلى راسهم صلاح عبد الله... وسارة الشامي دورها مكانش كبير بس كانت جيدة
- الفيلم كمان كان جيد جدا وممتازة على مستوى التصوير والكدرات والمونتاج وهندسة الصوت والديكور وإن كان متأثر شوية ب ديكورات الافلام الغربية ولكنها فى كل الاحوال كانت ممتعة فنيا وطبعا كل دة يعود لمخرج الفيلم هو بيتر ميمي
التقييم النهائي : الفيلم جيد جدا و يستحق المشاهدة و كبداية لنوعية السوبر هيرو فى مصر خطوة موفقة ولكن كل اللى محتاجينة أفكار آكتر والتوازن بين الدراما والخيال العلمي ونعلي على نفسنا سقف التحديات واللى المفروض دة يستمر معانا فى سلسلة أفلام "المستضعفون" ونقدر نعمل نقلة فعليا فى السينما المصرية
